Mag-iisang taon nang hinuhulaan ng mga Apple fan kung anong bagong teknolohiya ang isasama sa pinakahihintay na iPhone 5. Noong isang taon, parang lumabas na haka-haka na magkakaroon ng holographic projection ang smartphone.

Pinche aquí para ver el vídeo

Ngayon naman, ang pausong hula ay magiging transparent na raw ang iPhone 5. Ngayon pa lang marami na akong naiisip na bagong app para sa bagong hardware. Isa na doon ang makatotohanang magnifying glass.

Pinche aquí para ver el vídeo

Itong huli naman ang pinaka makulit at kalog sa lahat: ang iPhone 5 na nayuyupi tuwing umiinit, at kusang bumabalik sa dating porma. Alin, sa tingin niyo, ang mas magagamit ninyo?

El Bosquejo

Mula sa Bonifacio Global City noong isang taon, lumipat ang Fête de la Musique sa Makati: mula sa mga bar at hotel sa Makati Avenue, hanggang sa The Collective sa kalye ng Malugay.

Una akong dumaan sa B-Side (ang Rock Stage ng Fete), kung saan tumugtog ang beinte singkong banda, kabilang na ang Slapshock, Radioactive Sago Project, Ciudad, Outerhope, at Imago. May magkasabay na tumugtog sa main stage ng The Collective at sa loob mismo ng B-Side.

Medyo nahuli na ang aking pagdating, pero naabutan ko ang Ciudad bago ako lumipat sa Makati Ave.

Kapansin-pansin ang pinagkaiba ng audience sa bawat venue. Kung maraming teenager, hipster, at club kid sa B-Side, marami namang mga middle-aged na mag-asawa at magkakaibigan sa Heckle & Jeckle (ang Blues/Soul Stage).

Kung may mga bar na nagtitinda ng beer at pulutan sa ibang mga stage, may ihaw-ihawan naman sa B-Side (pagkaing kalye, kumbaga).

Dumayo rin ang mga kabataan sa roofdeck ng Time sa Makati Ave, kung saan tumugtog ang mga banda ng electronica.

Maraming magagaling na bandang tumugtog sa iba’t ibang venue. Pero kung ako ang papipiliin, mas masayang makinig habang kumakain ng fishball at kwek-kwek sa tabing-kalye.

Tulad noong nakalipas na taon, hindi sapat ang oras sa isang gabi para mapakinggan ang lahat ng mga tumugtog, kahit para masalubong ang mga kaibigang nagsidalo. Pero sulit pa rin ang oras, pati na rin ang pag-taxi, pagsiksik, at paglakad.

El Bosquejo

Bago matapos ang Hunyo, hayaan nating maghuling hirit ang ating pambansang bayani para sa buwan ng kalayaan. Dumaan ako sa Manila Contemporary noong isang linggo para sa eksibisyong “Through the Looking Glass: Jose Rizal”, isang pagmumuni-muni tungkol sa iba’t ibang bahagi ng kanyang makulay na buhay.
Kapansin-pansin ang “Sr. Jose ‘El Barbero’” ni Francis Commeyne: tatlong paskil ukol sa pagiging swabe ni Rizal bilang manliligaw at mangingibig. Syempre di nagbabago ang estilo ng buhok: taglay niya ang lahat ng inilistang katangian, o “hairdo”.

May iba’t ibang suklay para sa sari-saring estilo/katangian.

Alin ka dyan?

Ang “El Escandalo De Finales Del Siglo XIX” ni Lee Paje.

Si Rizal bilang tauhan sa Lego sa “Jose P. Rizal” ni Clairelynn Uy. Sana may ganito talaga? (Sa tingin niyo ba nakahon na rin ang ating bayani tulad ng mga tauhan sa Lego?)

Ang “Bandera I-III” ni Francisco Guerrero.

Tila ba humahaba ang bandila para ganap na takluban si Rizal?

Ang “Death of an Incognito” ni Erik Sausa. Mukhang si Rizal ang nakahandusay, pero kamukha niya ang mama sa larawang “The Son of Man” ni Rene Magritte, kung saan nakasuot din siya, tulad ni Rizal, ng isang bowler hat. Ano kaya ang pahiwatig ng mansanas tungkol sa nalalaman natin kay Rizal? Sa di niya nakikita? Higit pa siguro, sino ang tatlong babae? Sila ba ang Griyegong Fates na gumugupit sa buhay ng isang nilalang? Bumubuo ba sila ng bulaklak mula sa sinulid?

Itong susunod na dalawang mixed media work ay likha ni Don Salubaya. Ang una ay pinamagatang “Samantala”. Bahagi ang pamagat ng siping: “Samantala, sa bulwagan ng malaking bahay, ay…” na malamang ay buhat sa isa sa mga nobela ni Rizal. Alin sa tingin ninyo?

Ang susunod ay pinamagatang “Baket Daw?” Sa larawan, may kalalakihang nagsasabong, at may lumulutang na mga sipi ng pag-uusap. Kasama kaya si Crisostomo Ibarra sa eksena?
Sa lahat ng naisulat kay Rizal, malamang marami pa tayong di nalalam tungkol sa kanyang buhay. Paano kaya niya naisip ang kanyang mga naisip? Ano ang nakita niya sa mga Pilipino para ibuwis ang kanyang buhay?

El Bosquejo

Unang beses kong napadpad sa Philippine Toys, Hobbies, and Collectibles Convention (mas kilala bilang Toycon) nitong Sabado.

Syempre una kong napansin pagpasok ang mga cosplayers (costume players) na nakabihis ayon sa paborito nilang mga personahe galing sa comics, video games, atbp.

Hindi ko nakilala lahat ng mga laruan – siguradong tanda ng aking edad.

Pero maraming mga bagong laruang sariwa pa mula sa mga pinaka huling pelikula base sa comics.

Naaalala niyo pa ba ang sinauna at orihinal na kuwento ng X-men?

Anong mga grupo ang kinabilangan ni Gambit?

Buti naman at isinama si Bruce Lee (taong tunay na magaling sa martial arts) sa listahan ng mga superhero.

May mas bagay pa ba kay Christopher Reeve sa papel na Superman?

Sandamakmak na comics ang ibinenta.

Eto pa ang ilan pang mga laruang galing sa pelikula. Di ko nga maalala kung dumating na ang “Transformers 3″.

Avatar! (Bakit hindi 3-D?)

Si Luke Skywalker.

Ang kanyang maestrong si Yoda.

Galing ba ito sa “The Iron Giant”?

Hindi ito si Whoopi Goldberg; galing siya sa mga pelikulang “Predator”.

Ang aso/alien mula sa “Men in Black”.

Seed of Chuckie (mukhang pinarusahan siya ng tindera).

Si Stitch!

Mula sa Spawn na comics.

Biglang bumalik ang aking kabataan at ang mga araw ng pagbabad sa TV.

At sa wakas, si Batman ayon kay Chris Nolan.

Si Heath Ledger (RIP) bilang Joker.

Tingnan ang pinagkaiba ng dalawang interpretasyon.

Si Christian Bale bilang Batman.

Ang costume niya para sa susunod na pelikula (ang ikatlo at huli ni Chris Nolan)?

sa lahat ng nakita ko sa Toycon, ito ang di ko inasahan: si Manny Pacquiao.

Siya ulit, pero nakasuot ng Barong Tagalog.

Di yata ako sigurado saan sila galing…

Alam ko B ang simula ng tatak nitong mga manyika…

At mas lalong di ko alam anong tawag dito. Speaking ombre popsicle stick?
Hulaan niyo alin sa mga laruan ang tangi kong binili.

El Bosquejo

Maraming naaliw nang lumabas ang sarili nating Barong Tagalog sa mga fashion show sa Milan para sa Spring/Summer 2012 collection ng atelyer ni Valentino. Nagsilbing isang uri ng paglalagay ng porma sa lace ang mga likha.

Naulit naman ito sa Holiday 2012 show ni Veejay Floresca noong Philippine Fashion Week sa Mayo. Sadyang presko ang Barong Tagalog, na kadalasan ngayon ay gawa sa cotton, piña, o jusi. Ito ang isa sa mga namana natin sa kasuotan ng ating mga ninuno na sa kalaunan ay naging pambansang pananamit at uniporme para sa mga mahahalagang okasyon.

Dito, pinaghahalo ni Floresca ang materyal ng barong sa lace at sa leather. Ang ganda ng kinalabasang pagsasama ng mga kultura.

Ang dating payak ay di lamang naipagdiriwang, higit na madaling gamitin ng lahat: kapwa babae at lalaki.

(Mga imahen galing sa style.com at Status magazine)

El Bosquejo

Oo, marami pa ring malungkot dahil sa pagkatalo ni Manny Pacquiao sa kanyang laban kay Timothy Bradley, at hanggang ngayon pati rin sa pagkatalo ni Jessica Sanchez, isang Filipina-Mexican-American sa American Idol. Ngunit ngayong araw, higit na mahalagang isaisip ang lahat ng Pilipinong nagpunyagi at nagbuwis ng buhay para sa kalayaan ng bansa: ang ating tunay na mga bayani.

Ngayong araw, ika-12 ng Hunyo, ang ika-144 na anibersaryo ng pagtatag ng kalayaan ng Pilipinas sa Kawit, Cavite. Totoo, andami pa rin nating suliraning di masolusyunan matapos ng halos isa at kalahating daang taon. Hanggang ngayon, marami pa rin sa atin ang watak-watak. Walang nagsabing madali ang mamuno sa halos isang daang milyong tao, isama mo pa ang ga-higanteng mga problema pagdating sa pakikitungo sa ibang bansa.

Ngunit hindi ngayon ang panahon para maliitin ang ating mga tagumpay. Pagkatapos ng tatlong siglo sa ilalim ng mga Espanyol, nabuo ang ating iisang identidad na sumasaklaw sa 7,107 na isla ng Pilipinas. Tumindig tayo bilang sambayanan. Matapos ng pagmamalabis ng mga mananakop, nagising tayo bilang isang bansa.

Ngunit hindi nakakamit ang kalayaan sa pamamagitan lamang ng isang digmaan. Patuloy dapat itong ipinaglalaban. Araw-araw tayong titindig, sa pamamagitan ng pangkalahatan at sari-sarili nating mga gawain.

Araw-araw nating itinataguyod ang kalayaan ng ating bansa, at di lamang laban sa modernong mananakop, kundi laban sa inutil na mga pinuno, sa ating ugali, at sa kalakarang sumisira at nagpaparupok ng lipunan.

Malaya tayo para magtaguyod ng mga komunidad kung saan umuunlad ang lahat at walang sinasamantala.

Malaya tao para ipagdiwang ang maganda at mabuti sa isa’t isa.

Malaya tayo para umibig, magpalaki ng pamilya, mag-aral at mamahagi ng galing at kaalaman, makihalubilo. Malaya tayo para magmalasakit at makialam.

Responsibilidad ang kalayaan. Isa itong biyaya na dapat alagaan at payabungin. Alalahanin natin ang payo ni Jose Rizal, ang ating pambansang bayani, tungkol sa paglingon sa nakaraan. Walang ibang paraan para marating ang pupuntahan.

(Galing ang mga larawan sa 2012 Philippine Independence Day Parade sa New York. Pasasalamat kay Noel Y. Calingasan para sa pagpapaunlak.)

El Bosquejo

Ilang taon nang nasa Greenbelt 5 ang tindahang Myth, isa sa mga Pinoy-only na boutique sa ikalawang palapag ng naturang mall. Kita kagad sa pintuan ang mga pangalan ng mga beterano at baguhang designer na bumubuo sa grupo: sina Randy Ortiz, Chris Diaz, Francis Libiran, Henri Calayag, Jing Monis, Joel Escober, Joey Samson, Louis Claparols, Noel Crisostomo, ProudRace, Robin Tomas, at Xernan Orticio.

Itong mga bestidang lace ni Joel Escober ang isa sa mga una kong napansin pagpasok ng boutique.

Imbes na karaniwang itim na kulay ang ginamit, asul ang pinili ni Escober, na kanyang ipinatong sa cream. Asyano ang dating ng burda, malalaki ang kumpol at di kasimpino ng maka-kanluraning dibuho.

Kapansin-pansin din itong mga floral na polo ni Randy Ortiz para sa Myth. Kagad kong nalala ang kamisang suot ng maglalatik dahil sa pulang polo sa gitna. Oo, kakatapos lang ng panahon ng tag-init sa Pilipinas, ngunit sa palagay ko babagay pa rin ang bulaklaking damit para sa umaga.

Mga blazer naman ni Ortiz sa matitingkad na kulay at beige, kasama ng floral at paisley na print. Kung medyo nahihiya pa ang mga kalalakihang umagaw ng pansin, ibagay lamang sa maong at khaki: siguradong hindi niyo mamimiss ang tag-init.

Kaiga-igaya ang shop window ng Myth dahil napapalamutian ng mga kuwintas at sinturon ni Chris Diaz na yari sa sigay (ginagamit sa sungka), semi-precious stones, crystal, at plastic.

Sigurado akong magugustuhan ito di lamang ng mga nanay na nag-oopisina, kundi pati na rin ng mga dalagang mahilig sa kakaibang accessories.

Oo, tunay na balat ng ahas ang ginamit para sa mga tote, cluthc, at minaudière ni Randy Ortiz.

Para sa mga sawa na sa animal print na cheetah, leopard, at kahit tiger, pag-isipang balikan ang eksotikong python.

Mga clutch ni Adante Leyesa na yari sa rattan, beads, at semi-precious stones. Babagay ang kulay ng natural fiber sa maong at pang-araw-araw ng bihis, at pati na rin pam-party. Ito ang disenyong masasabing tunay na atin.

Kakaibang kuwintas ni Joel Escober. Kita niyo ba ang mga ginamit niyang zipper?

Mga gawa nina Leyesa at Escober. Marami pang makikita at magagaligad sa Myth, lalo na para sa mga naghahanap ng kakaibang desenyo na yaring Pinoy. Siguraduhing bumisita kapag napadaan kayo sa Greenbelt 5. Baka tulad ko, matuwa kayo sa ilang damit o accessory na di niyo matitiis na di maiuwi.

El Bosquejo

Bago ang lahat: maligayang Pandaigdigang Araw ng Kalikasan! Ano ba itong World Environment Day Challenge? Panoorin itong maiikling video mula kina Gisele Bündchen, Ian Somerhalder, at Don Cheadle para magka ideya.

Pinche aquí para ver el vídeo

Taon-taon, ipinagdiriwang ng United Nations ang World Environment Day tuwing ika lima ng Hunyo. Nangunguna ang United Nations Environment Programme (UNEP) sa pagpapaalam sa nakararami ukol sa mga inisyatiba tungo sa pangangalaga ng kalikasan at paglunsad ng mga programa para sa sustainability. Ang tema ng World Environment Day para sa 2012 ay “Green Economy: Does it include you?”

Ano nga ba ang Green Economy? Sa simpleng salita: ito ang pamamalakad ng negosyo at komersiyo sa pamamaraang nakabubuti sa pag-unlad ng indibidwal at sa kalikasan habang isinasaisip ang pangmatagalang epekto ng anumang gawain. Ang pangunahing pamamaraan tungo rito: low carbon emissions, resource efficiency, at social inclusion.

Pinche aquí para ver el vídeo

Ano naman ang World Environment Day at WED Challenge?

Ang World Environment Day, na hinohost ng Brasil ngayong 2012, ang inaasahang pinaka malaking pagdiriwang sa daigdig tungo sa positibong inisyatiba para sa kalikasan. Pakay ng WED 2012 na hikayatin ang pinaka maraming indibidwal at grupo sa mundo na makisalo sa mga gawain alang-alang sa kalikasan.

Para sa WED Challenge, kailangan lamang pumili ng inisyatibang pinaka malapit sa inyong puso: maging pagtatanim ng halaman o pagtitipid ng kuryente. Kailangang pasok ang mga entry sa alinman sa mga category (may pipiliing kampyon para sa bawat isa): People (paramihan ng tao), Creativity (makabagong paraang “out of the box”), Buzz (madaling kumalat sa internet), Impact (malaki ang epekto sa nasasaklaw), at Theme (ayon sa temang “Green Economy: Does it include you?”).

Mamimigay ng 5 fuel-efficient na kotse ang Kia Motors sa bawat kampyon. Ano pang hinihintay niyo? Mag-register na!

Ano ba talaga ang tunay na nagpapasaya sa atin? Ito ang pambungad na tanong sa bagong issue ng Colors magazine. Karugtong siguro nito: ano ang nagpapabangon sa atin sa umaga, ano ang nagpapagaan ng ating loob, ano ang ating kakapitan kahit na saksakan na ng hirap? (Di lang basta saging ang nagpapagaan ng ating damdamin…)

Bahagi ng nilalaman ng issue ang ilang sanaysay tungkol sa pag-ibig, sa tamang pag-iisip, sa paghahanap ng kahulugan sa buhay, at pagsuri sa ugat ng ating mga problema.

Nasa lugar ba ang paghanap ng kasiyahan? Nasa materyal na bagay ba o sa pagmamay-ari?

Sa unang tingin, sa palagay niyo ba ay masaya ang mga batang itong may hawak ng kahoy sa hugis ng mga baril?

Mas masaya ba sa siyudad o sa kabundukan? Sa pagtrabaho buong araw sa opisina o sa pagkayod sa taniman? Ganun ba kasimple ang pagtanong at pagsagot?

Kung sabihin ng mga siyentista na kaugnay ng katawan ang ating kasiyahan, anong kailangang palitan? Pagandahin, bawasan? Malamang di lamang panlabas ang pinag-uusapan, kundi pati na rin ang kabutihan ng katawan.

Kung mas madalas ka bang nakangiti o tumatawa, mas madali ka ring sumaya? Ipinapakita dito ang iba’t ibang paraan ng pagngiti.

Matagal nang sinasabi na malaki ang tulong ng palagiang pagtawa di lamang sa ating kalusugan, kundi pati na rin sa ikabubuti ng ating pagkatao. Kapag mas magaan ang pakiramdam, totoo kayang mas mahirap kapitan ng sakit?

Kailangan nating lahat magbigay at makaramdam ng pagmamahal, ang pagiging malapit sa isa pang tao. Kumbaga, di tayo makukumpletong mag-isa. Ito kaya ang pinaka mahalagang susi sa kasiyahan?

Maaari rin namang nasa isip lang talaga natin ang lahat, kasama na ang kasiyahan. Anuman ang mangyari sa ating buhay, o kung sino man ang makakapagpaligaya sa atin, nasa sa atin pa rin kung pipiliin nating sumaya.

Sa iyong karanasan, anong bagay/sinong tao/anong pangyayari ang pinaka nagpasaya sa inyo?

El Bosquejo

Sa bawat isa sa ating labing-anim na blogger, sa mga mambabasa, sa administrator ng United Blogs of Benetton, at sa lahat ng kapamilya sa United Colors of Benetton: maligayang kaarawan!

(Di ko sinasadyang mapapikit habang umiihip ang hangin.) Naaalala ko pa noong una akong nag-blog para sa Benetton. Para iyon sa IT’S MY TIME Global Casting campaign noon pang 2010. Iilang blogger pa lang kami noon, at ngayon, makalipas ng dalawang taon ay labing-anim na kaming lahat. Ako na lang at ang Montaigne Street at Botica Pop ang natira mula sa IT’S MY TIME, naging blogger na rin si Magali (ang model na nanalo mula sa Pransya), at ang dami pang nadagdag mula sa Chile, España, Pransya, Italya, Korea, Mehiko, Olandia, Perú, Portugal, Turkey, Rusya, Colombia, Bulgaria, at Tsina. Sana lalong lumaki pa ang ating pamilya!

El Bosquejo